 |
| أحمد الدخاخنى |
إعتراضات متفق عليها
بقلم
أحمد ربيع رزق الدخاخنى
القلب ساق والعقل برضه أساء
الدنيا ولا الوهم! .. كله سواء
مش عارف امتي هلاقي الاستثناء
ولا قادر أفهم أبسط الأشياء؟!
شافوا الحياة.. شُفت الحياة بخلاف
خافوا الطريق.. شُفت الطريق بيخاف
شافوا الصديق.. شُفت الصديق شفاف
واقفين وراه نتحامي مـ الأضواء!
قالوا الغِنى.. قولت الغُنا ده مزاج
قالوا الضَنا.. قولت الغُنا ده مزاج
قالوا الرضا.. قولت وأَنا محتاج
إديني صبر وزُقِّني في بحر ابتلاء
حَبوا الحياة قولت الحياة بِدعة
عملوا البِدع قولت الخِدع صنعة
أخدوا الهوا ماعرفش كام جرعة
قالوا دوا وانا كنت شايفه وباء
قالوا الـ أنا قولت الـ أنا أعلي
قالوا الدهب قولت الحديد أغلي
قالوا اتهبل قولت الزمان أغبي
روحوا أسألوا كان إيه مع القدماء
قالوا فهمنا.. قولت مش فاهم
قالوا عرفنا.. قولت اهو يعالم
بطلت اصدق في الحياة عالم
علشان فشلنا في مادة الأحياء
مكسوف حقيقي بقولها في الضلمة
عايشين في وهم كتير وبالجملة
لو لازم اكتب لـ التاريخ كلمة
هختارها تبقي كفيفه او صماء
وانتي اللي لازم تفهمي قصدي
هقول حبيبتي وتطلعي بلدي
مهروسه يعني الفكرة بالبلدي
فانا مش هقولها هخلي فيه استحياء
المره دي معكوسه ياحبيبتي
هقول يابلدي وتطلعي انتي
خليكي طالعه لأمي يابنتي
سامحيني هغلط هو اصلا داء
هغلط اكيد وهخدها علي قهوة
والاقيكي طبَّه عليا علي سهوة
انا لو ملاك فـ منين اجيب شهوة
علشان احبك وابقي بلا أخطاء!
مقدرش اكتف روحي فـ بسيبها
طول عمري بغلط لما بحسبها
ف بقيت بَهد واعيد فـ تركيبها
محتار ده فهم زيادة ولا غباء!
